Srombotan

Mas Ruscitadéwi

Lalah, kéwanten nyangluh wantah rasa sané prasida kapolihin ring basa jangan srombotanné. Basan srombotan sané makalas, madaging kunyit, isén, bawang, kesuna, mica, lan cekuh, kalablab kantos kentel. Basa puniki raris kakancuhin, ring basa tabiané, anggén nagingin makudang-kudang jangan miwah kaimbuhin kacang-kacangan.

Basa lalah, manis, lan nyangluh puniki sayan jangkep ri kala matemu sareng jangan paya sané sada pahit, kacang botor sané emes lan kacang magoreng sané sada katos. Sakadi makudang-kudang rasa lan pangrasa magilikan dados siki, ngwetuang rasa jaen, nyangluh sané tan sida bandingang.

Jangan srombotan pinaka jangan khas saking Klungkung, Bali, rasanné sayuwakti ngangobin lan nglangenin, sakadi pamargin uripé ring marcapada.

Yéning manah-manahang, manawi ké sang sané nemu jangan srombotan i nguni, wantah seniman utawi guru loka sané kapiandel, sané sampun prasida uning ring makudang-kudang rasa mawinan prasida nyikiang rasa punika ring ajeng-ajengan sané mawasta jangan srombotan.

Kawéntenan jangan srombotan, pinaka jangan khas saking Klungkung, minab tan dados pasahang saking kawéntenan widang Klungkung pinaka pusat kerajaan Bali, turin pinaka genah mapupul para pradnyané sami, utaminé para pradnyan sané pascat ngenénin pamargin jagat lan kahuripanné.

Ring jangan srombotanné sang seniman pradnyan sakadi micayang pangajah-ajah majeng kramané sami parindik pamargian idupé sané kajangkepin antuk makudang-kudang rasa. Rasa manis sinah pacang malenyad tur ngenyebin yéning nénten katimpalin antuk rasa pahit, pakeh, lan lalah. Kénten taler rasa lalah, sinah wantah pacang ngawi sakit waduk yéning nénten kadagingin rasa manis lan nyangluh.

Sakadi sasegakénné sané mamunyi "Clebingkah batan biyu, gumi linggah ajak liu" sané nganikain mangdané i raga nrima indik kawéntenan jadma ring jagaté sané mabina-binaan indik parisolah, kasenengan lan sané siosan. Uning ring kawéntenan punika kaptiang i raga setata prasiada ngajiang anak siosan yadiastun mabinayang.

Tatuek sané kasinahang saking jangan srombotan minab masaih kadi sasenggakan inucap. Saking jangan srombotan, saking ajeng-ajengan, saking waduk, sané nampek lan sarahina-rahina i raga prasida nyuluhin pamargin urip lan jagaté, sané wantah pacang prasida labda yéning madaging makudang-kudang rasa. Suka, duka, lara, pati wantah daging urip manusané sané nénten sandang kaselselin, wantah patut karesepang.


saking: www.balipost.com