Koprasi-koprasian?

Mas Ruscitadéwi


Tatujon kawéntenan koprasi sujatinné luih pisan. Ring koprasiné kaaptiang kramané sané dados anggota prasida sagalak-sagilik salunglung sabayantaka.

Kéwanten sakadi sasenggakanné sané maosang layahé sayuwakti nénten matulang, kawéntenan koprasiné taler asapunika.

Sampun makudang-kudang koprasi kawangun, sampu akéh koprasi sané prasida nglimbak ageng, taler akéh sané nénten karuan idup matinné, semaliha banggéné taler nénten kapanggihin.

Polah palih indik koprasi sujatinné sampun becik pisan. Yéning becik tur kamargiang sakadi polah-palihnyané sinah pacang prasida nulungin anggotanyané. Kéwanten polah-palih sané becik puniki sané ketah kakirangang lan katambahang, mawinan koprasiné srandang sréndéng sangkaning lakar wewangunné lémpas ring kasujatinné.

Contoné indik syarat ngwangun koprasi sané patut kasarengin olih paling kedik kalih dasa diri anggota pendiri lan satusan anggota biasa. Indiké puniki sané ketah kamainang. Sayuwakti sané menggah ring akta pendirianné kalih dasa diri krama sakéwanten, sané asiki ketah wénten sané bayunnyané agengan ring anggota pendiri siosan. Duaning bayu lan modalné kalintang ageng, mawinan sané asiki punika prasida ngatur pamargin koprasiné. Yéning kanikain ngelodang sinah pamargin koprasiné pacang ngelodang, kénten taler yéning kanikain ngajanang, prajani pacang ngajanang.

Kawéntenan punika sujatiné nénten pacang margi ring koprasiné yéning nganutin kasujatian tatuék koprasi sané nyinahang keputusan indik koprasi magenah ring rapat anggota, tur suang-suang anggota madua suara sané pateh. Napi malih wénten pengawas, sané patuté ngawasin pamargin koprasiné. Yéning nii sampun mamargi, sinah koprasiné pacang mamargi antar.

Koprasi sané akéh katangiang mangkin ketah, katangian alih praragan, kéwanten ngatasnamakan krama akéh. Sakancan pamutus, napiké indik jinah sané kaselang lan kasimpen, kaputusang antuk manahnyané praragan, sané siosan wantah pegawé. Duaning nénten wénten pendiri, anggota sané seken, pabligbagan seken, nénten wénten sané seken ngawasin, ngranayang koprasi inucap nénten pacang mamargi sakadi koprasi patutné. Duaning pendiri lan angotané wantah uluk-ulukan, mawinan sané metu wantah koprasi-koprasian.


saking: www.balipost.com