Madedagangan

I Gusti Madé Sutjaja

Madedagangan pala gantung wiadin pala bungkah sawai-wainan anak saja nekaang pikolih wang ané nglaksanayang swadarmaning darma pamaculan wiadin matetanduran. Pikolihné lantas abana ka peken-pekenné adepa apanga maan pipis. Pipisé lantas anggona matetendakan apanan lonto ané buatanga di paumahanné. Malaksana buka kakéné anak suba uli uling-uling kadabdab baan wang Baliné.

Yaning jani koné tongos wiadin tegak matetandurané suba ngangsan nyerikang wiadin nyupitang di nusa Baliné lantas kénkénanga wangé ané biasa madedagangan wiadin madep-adepan lakara malaksana buka ané suba-subanan? Buka kakéto liu anaké pada matakon mapan tongos-tongosé ané biasa dadi tegak medagang suba ngangsan sépi-jampi. Nanging, tongos-tongos madedagangan pala bungkah wiadin pala gantung uli dura nusa wiadin dura nagara ngangsan limbak tur ramé. Pianak-pianak wang taniné anak suba magingsir gaé; tusing buin rungu tekén gaginan wang tuané. Adénan suba nanggap upah dadi paladén di tongos-tongos madedagangan buka janiné. Buka kéto krimik-krimik Pekak Polos ipidan. Jani, ia tusing buin pakrimik nanging suba ngrépét pakrumuk dugas pituturin tiang léwat cucunné indik wang taniné di Panegara Jepang.

Ditu, kéto ia ngawit mapitutur, uli ilu kanti janian wang taniné anak nerus kasihin, kadabdab, tur katindihin baan pamréntahé. Pikolihné sawai-wainan tur sabilang masa anak saja kaolah tur kapadedagangang di peken-peken cerik wiadin tongos-tongos madedagangan gedé. Dadiannya, di tongos-tongosé ténénan anak saja pikolih tur paolahan pala bungkah wiadin pala gantung padéwékan ané adepa muah tendaka baan sakancan kramané. Guminné anak dadi tongos lan tegak matanduran tur maolahan buka apa ané laksanaanga baan wang dininé, lan pikolihné laut kapadedagangang buat kramanné. Ulian maan sih tur tindihan jati uli anaké gedé dadinné darma pamaculané di guminé ento anak nerus landuh nganti janiané. Buka kéto cucun Pekak Polosé mapitutur ajak pekakné. Bengong ia madigehang sambilanga nilik-nilikin makudang-kudang gagambaran wang tani tur pikolihanné ané ngenah di kelir komputer laptop cucunné. Bih, saja ngangobin; kéto pamineh pekakné.

Buin pidan ké lakara peken-peken wang taniné dadi idup maglidehan buin buka i pidané? Buin pidan ké luh-luh wang taniné dadi bisa ngidupang padedagangan pikolih magarapan tur maolahan di carik lan tegalané?

Ané sanget sebetanga baan I Pekak Polos anak tusing ja ngured padedagangan tur paolahan pala bungkah lan pala gantungé lonto. Jati, ané tusing papegatan nyeletin paminehné indik magarapan di carik tur tegalané anak saja tuah laksana madedagangang kapatutan. Wang taniné koné patut maan pitulungan ané marupa subsidi kéné kétoné, minakadinné pupuk lan péstisida, muah liu ané lénan. Ngudiang té kapatutané ténénan dadi buka kapadedagangang, karikrik-rikrikin, kaubat-abitin? Kéto ia krimik-krumuk yadiastun ada anak ningeh wiadin tan, baan wang lén wiadin cucunné.

Laksana wiadin pamineh madedagangan janiné anak saja tusing ngindikang pikolih uli madep-adepan pala bungkah lan pala gantung lonto. Marikrikan di laksana madedagangané anak suba ngruakin tur nglimbakin pariindikan laksana patetulungan wiadin pamatutan. Madedagangang makedaduané ténénan anak saja nekaang pikolih; pikolih marupa pipisé. Pipis ané mangranayang aget koné yan tan ketara di kadiniané. Di kadituané, marepan ajak Sang Suratma, pedas bakalan kaketaraang. Ulian ento, sengkala jati katandang mapan tusing ada buin laksana madedagangan.


saking: www.balipost.com