Mémé Ketumpit

Olih W. Suardiana

Di sisin alasé wayah, kacrita ada jadma ngubu madan I Mémé Ketumpit ajaka somahné I Bapa Ketumpit. Sawai-wai gegaén I Bapa lam I Mémé Ketumpit tuah di cariké dogén miara padi muah pabianan, minakadi kaséla, ubi, miwah kacang-kacangan. Sawiréh ajaka dadua jemet gati magarapan, dadi, padi miwah pabiananné kaliwat mokoh tur nadi buah lan umbinné.

Nuju dina anu, Mémé Ketumpit sedeng malebengan nglablab biu di paonné padidian. I Bapa Ketumpit tuara ada jumah sawiréh suba pasemengan dégdég luas ka carikné. Sagét, teka I Lutung pecéhan nengok uli bucun paonné maekin Mén Ketumpit.

“Mémé Ketumpit apa ento kagaé, malepuk paon Méméné? Kéto patakonné I Lutung pecéhan tekén Mémé Ketumpit. Mara kéto I Lutung pecéhan matakon, Mémé Ketumpit masaut:

“Mémé nglablab biu aduang bulih lakar lablabang mémé Bapa Ketumpit, somah méméné, apang ada abaang mémé ka carik buin kesepan.”

“Icang ngidih abulih, yén sing baang lakar kagorgor nyonyoné!” Kéto panagihné I Lutung pecéh. Sawiréh baan jejeh kenehné I Mémé Ketumpit ningeh munyinné I Lutung pecéh buka kéto, dadi ia ngemaang tur masaut sada ngreres.

“Nah, ditu suba jemak!”

Jani, laut koné I Lutung pecéh macelep ka paon I Mémé Ketumpité, nyemak biu malablab. Buina, tusing ja biu dogén ané idiha, makejang dedaarané ané dadi daara tekén Mémé Ketumpit, ané suba lebeng lénan tekén biu, jemaka masi baan ia tur plaibanga abana ka tengah alasé. Nepukin dedaaranné suba telah, sedih koné kenehné I Mémé Ketumpit, tur ia lantas majumu nguskus kaséla. Sedeng ia nguskus kaséla, sagét buin ada teka lutung madan I Lutung Puruh.

“Béh..., Mémé Ketumpit buin makudus paonné, apa kukus mé?”

“Mémé ngukus kaséla duang tebih.”

“Ngidih abedik, Mé, icang suba makelo tusing ngamah anget-angetan, kanti puruh!” Kéto pasautné I Lutung Puruh, laut koné ia macelep ka paonné Mémé Ketumpit. Patuh cara I Lutung pecéhan, I Lutung Puruh masi ngodag nyemak sakancan ané dadi amaha ané ada di paon I Mémé Ketumpité makejang koné pondonga abana ka tengah alasé. Nepukin unduk buka kéto, nyangetang lantas I Mémé Ketumpit sedih.

Sedek ia bengong, ditu teka koné kurenanné I Bapa Ketumpit uli di cariké.

“Béh, ngudiang méméné ditu negak, sada masebeng jengis saha ngetélang yéh mata buka ka kéto? Kurenan teka patut gaénang kopi apa malu!” Suud ngraos kéto, Bapa Ketumpit ngejang tambah betén umah jinengné. Mémé Ketumpit laut nuturang undukné tekén kurenanné sangkalanga kanti ada ia sedih buka kéto.

Maan raos buka ané orahanga tekén somahné buka kéto, prajani koné pedih basangné I Bapa Ketumpit tur masaut sada bangras, “Nah..., lamun kéto unduké, bli lakar ngaé daya apang nyidaang ngamatiang lutung-lutungé totonan. Jani kema nyai goréng sengauké, suba lebeng jangin uyah liunan. Sinah bon sengauké lakar naut soroh lutungé teka mai! Yan suba teka tanjénin ia ngidih sengauk. Sinah ia lakar bedak, ditu mara pesuang tuaké, turuhin bungutné tuak. Sinah suba lutungé totonan lakar mising ajaka makejang!”

Répot koné Mémé Ketumpit ngoréng sengauk kanti suba lebeng laut isinina uyah acangkop. Bon sengauké ngalub kanti ka tengah alasé tur adeka tekén lutung-lutungé totonan. Tusing makelo sagét suba teka soroh lutungé liu pesan ngebekin natah Bapa lan Mémé Ketumpité. Pacruét lutungé ngendus bon goréngan sengauk Mémé Ketumpit, ada ané magandong ajaka timpalné, ada ané maseluk nagih majujuk di maluan apanga énggal paek tekén wit boné totonan. Kéto masi ada ané kanti makerah nagih si maluan makaukan tekén Mémé Ketumpit.

“Mémé Ketumpit, apa kagoréng dadi jaen tur nyangluh pesan boné?” Kéto patakonné I Lutung pecéhan

“Mémé mara suud ngoréng sengauk, né cai ngidih?”

Mara kéto pananjéné I Mémé Ketumpit tekén soroh lutungé, dadi magarang koné ajaka onya ngrebut pané wadah sengauké. Ada ané nyemak nganggon lima, ada ané nyelukang bungutné ka panéné. Makejang liang ngamah sengauk yadiapin masa pakeh. Suba koné lantas telah sengauké, lutungé makejang pada bedak. Makejang uyut nagih ngidih yéh tekén Mémé Ketumpit. Ditu lantas Mémé Ketumpit ngenjuhang tuak mawadah caratan.

Makejang soroh lutungé ngenggangang bungut laut turuhina baan tuak saka besik tekén I Mémé Ketumpit ajaka I Bapa Ketumpit. Suba rata maan nginem tuak, sagét makejang soroh lutungé lempuyengan tur nyakitang basang. Ada ané glalang-gliling, ada ané utah-utah, tur ada ané pakepritprit mesuang tai. Ditu lantas para lutungé malomba nuju tukad lakar masakit basang. Patikaplug, saling tomplok, magrudugan koné para lutungé malaib ngungsi tukad. Katuju lantas dugasé totonan ada ujan bales di dulu, dadi yéh tukadé blabar agung. Tusing nepukin yéh blabar, jag makejang koné lutungé macebur ka tukadé lantas anyud ajaka onya.

Sasukat lutungé telah anyud, tusing koné ada ané ngadug-adug buin kumah I Mémé Ketumpit lan I Bapa Ketumpit. Sinah suba lega pesan kenehné jani.


saking: www.balipost.com