Lumut-lumut Watulumbang (54)

Dadi Patuhang Sing Dadi Patuhin


Yén panes di jalan, pajengin awaké. Yén panes awaké ulian gelem, da mapajeng di pamulesané. Panes di jalan teka uli matan ai ba duur. Panes dugasé gelem, teka uli tengahan awak. Matanai mula panes, kéwala matanai sing kapanesan. Awinan sing ada matanai mepajeng. Yén Betara Surya di muncuk Padmasanané mapajeng, sing ulian Ida kapanesan, ento demen-demen atin panyungsungné. Keto caran anaké maktinin Betara.

Liu caran maktinin Betara. Ada matuhang Betara cara manusa. Yén manusané mabaju, Betara mabusana. Manusa mapajeng, Betara matedung. Manusa masehin batis, Betara mawajik cokor. Manusa manjus, Betara ka béji. Kéto masih ajeng-ajengan, malancaran, muah malila cita. Nganti suka dukan manusané patuhanga. Awinan orahanga Betara duka, Ida lédang, Betara bares ring anak rajin ngayah. Awinan makejangan anak mabakti buka ngomong kisi-kisi ajak Betara. Yén ada cekcek mamunyi, orahanga ciri atur piuningné kapireng olih Betara. Demen atiné. Liang kenehné. Ingan awakné.

Neked ditu nyidang manusane matuhang Bathara. Lebihan teken ento mirib sing kepineh, mirib sing bani. Yen kepineh-pineh, mula ada dresta buka keto. Drestane ngelah kepatutan, madan kepatutan dresta. Kewala liu kone dresta ane sing patut.

Ané anggon sikut ngorahang sing patut, tattwa koné ento. Dadiné kapatutan tattwa tegehan tongosné tekén kapatutan dresta. Yadiastun kéto, sing prajani anaké bani nganti dresta, apabuin ngilangan dresta. Orahanga tattwa teka durian tekén dresta.

Yén tattwa dogén sing nyidang ngobah dresta, apabuin susila (étika). Tongos sikut susilané orahanga beténan tekén tattwa. Dadiné dresta ané paling tekek negul krama. Mula sing aluh madingan keneh (amuter tutur), apabuin ri kala nu kekeh mategul.

Lanturang malih kedik indik dresta. Ring kawéntenané, Betara ané patuhanga cara manusa, boya manusa matuhang ibané tekén Betara. Lén sajan ento. Yén manusa matuhang ibané cara Betara, ento orahanga sing dadi. Sing koné ada dresta matutang anak buka kéto. Orahanga mamada-mada.

Mara Betara kalinggihang di gedong meru, milu ia ngaé umah cara gedong méru maraab duk. Mara Betara matedung agung, milu ia masang tedung agung di jelanan umahné. Jelék pesan koné anaké ané mamada-mada Betara. Idupné kapanesan. Kulawargané kapanesan. Umahné masih kapanesan. Panes ané buka kéto sing ilang ulian mapajeng. Sing masih seger ulian makomprés, ulian maubad ka dokter spésialis, utawi ka balian sakti.

Sing aluh ban ngresepang yén orahanga ‘manusa dadi matuhang Betara”, kéwala “Betara sing dadi patuhin”. Yén ada anak cucud nakonang unduké ento, sing tawang kénkén ban nyautin apang melah.

Yén sing ada anak nakonang, rasané makejang anaké suba ngelah pangresep apa ané dadi, apa ané sing dadi. Ento orahanga pangrasa. Yén sikut pangrasa anggo, “dadi kén sing dadi” ané lakar tepuk, boya “beneh teken pelih”. Sing koné ditu tongos beneh kén pelihé. Ané orahanga beneh di tattwané, sakancan ané ngeranayang i raga paek tekén Ida Betara. Ento koné beneh. Ané ngranayang i raga ngejoh-ngejohang tekén Betara orahanga pelih. Yén keto dong liu anak ngorahang ibané paek tekén Betara, pang kadéna beneh. IBM. Dharma Palguna


saking: www.balipost.com