Basang

Luh Suwita Utami

Panes ainé nyentér uli di jendélané, gagéson tiang ngerétang kordenné. Saget ada anak ngetok pintuné. Buwung tiang negak, ungkabin tiang jendelané.

Saget, “Bli Nyoman Wira?,” tengkejut tiang tekén anak muani ané saget ada di arepan tiangé “Suba suud I Luh ngajahin?,” kéto anaké ento matakon. Makelo tiang tusing masaut, rasa sing percaya tiang tekén unduké ené. Jajap tiang masaut, “suba, mai malu negak, tiang nu matamped,” kéto tiang nyautin.

Ngejer liman tiangé nampedang buku-bukuné ané makacakan di duur mejané. Tusing sida tiang nyatwang gerudug takahé. Makelo tiang tusing katemu ajak anaké muani tenénan, dasa tiban, roras tiba, ah…, tiang suba engsap pidan kadén tiang ketemu si dori ajak ragané. Ragané medasin tiang menék tuun, karasa ada ané malénan di déwék tiangé. Tiang nyaru-nyaru tusing nawang.

“Uli dija Bli nawang tiang ada dini?,” keto tiang iseng matakon.

“Uli timpal-timpal I Luhé. Tusing ja sukeh ban bli ngalihin I Luh. Yadiastun I Luh mengkeb ka betén batuné, yén keneh I Luhé setata nyambat-nyambat bli. Pastika lakar tepuk ban bli ngalihin.”

Tiang nengil, takut yén nyautin lakar lantang panadiné. Saja masih apa ané orahangé ajak Bli Nyoman, tiang tusing sida lakar mengkeb uli ragané. Keneh tiangé setata nyambat-nyambatang ragané. Kanti jani, disubané dasa tiban tiang mapasah.

Disubané kéto, tiang nerusang masuk di sakolahan guru, sakadi janjiné pidan. Tiang dot dadi guru, tidong lénan tekén ento. Nanging Bli Nyoman suba kadung kakanténan ajak nyamanné uli Surabaya, tusing prasida tiang naenang sakit kenehé sangkaning Bli Nyoman tusing nyambat apa-apa tekén tiang. Saget, tiang nrima kiriman kartu merah ané misi adan Bli Nyomanné ajak anaké eluh totonan, lakar ngantén. Suud, tusing sida tiang suud ngeling. Karasa asibak ragan tiangé mati.

Kukuh tiang tekén déwék, tusing lakar nyambatang teresné tekén anak muani lénan. Tiang tusing bani, takut lakar ngrasayang sakit di kenehé buin. Lénan tekén ento, tiang nu sanget tresna tekén Bli Nyoman Wira. Depang suba tiang padidi, nyepelang kenehé ené kanti buin pidan.

Atiban, duang tiban, tiban-tibanan tiang nyepel teresnané. Makejang anaké matakon, nguda tiang sing karwan ngantén, makejang adin-adiné ngalahin tiang ngantén, ada ané suba ngelah pianak dadua, ada ané suba bajang pinakné, mirib suba ngancen ngelah cucu jani. Nanging tiang nengil. Yadiastun tiang nengil, anaké pastika suba nawang kénkén keneh tiangé sujatiné.

“Ada ané lakar satuang bli ajak I Luh, penting! Ento awanan bli mulih uli Surabaya,” tiang enu nengil. Siswa-siswiné masliweran, ada ané nyeledet uli jendelané, mirip dot nawang nyén ané ajak tiang ngorta. “Yén I Luh ngelah galah, ajak bli I Luh ngorta akejep ditu di kafé kopi.” Tiang marasa Bli Nyoman mula saja serius lakar ngajak tiang ngorta. Mirib saja penting lakar sambatangé.

Di dauh alun-alunné mobil sédan ané tumpangin tiang ajak Bli Nyoman parkir. Ajak dadua tiang macelep ka kafè kopi, suwung pesan kafené. Tiang ngangsehang apang runtag bayun tiangé tusing malawat di muan tiangé.

“Ada apa mirib bli nyoman saget nadak ngalih tiang?”

“Ampura, bli tusing nyambat tekén I Luh unduk bli mulih tur lakar katemu ajak I Luh.”
”Bli mula tusing taén nyambat apa-apa ajak tiang,” kéto tiang masaut ngambrés sakadi mesuang pedih basang tiangé ané suba makelo matanem.

“Bli nawang I Luh nu pedih tekén bli, terima bli pedih I Luhé, lakar bekelang kanti mati. Mula bli kadung suba majalan,” saget Bli Nyoman nyaup liman tiangé tur ngembel tekek pesan, “Nanging, bli nu tresna tekén iluh kanti jani. Tusing ada ané sida lakar ngentinang tongos I Luhé.” Tiang buin tengkejut, sanget tengkejut.

“Ampura, tiang suba engsap tekén unduké ento,” kelésang tiang liman tiangé.

“Da I Luh nguluk-nguluk, I Luh nu setata teka di ipian bliné. Tu ciri I Luh nu setata nyambat-nyambat bli,” tiang negil, yéh matané das ulung di pipiné.

“Luh, né ada pangidih bliné tekén I Luh. Saja mirib bli wanén, nanging bli tusing lakar malaksana kakéné yèning tusing tekén I Luh, bli tusing enyak. Nyak I Luh ningeh satuan bliné?”

Tiang tusing masaut, mara jani Bli Nyoman makita nyatua ajak tiang. Apa mirib ada?

Bli Nyoman, suba duang bulan ené ngalihin tongos tiangé ngoyong. Timpal, nyama, makejang anaké ané nawang tiang takonangé, kanti ia nawang tiang ngajahin di Désa Jimbaran. Tetujoné ngalih tiang, ngidih pelih tekén unduké ané pidan, to ané utama. Ané nomor dua, ngidih tulung apang tiang nyak dadi “perempuan sèwaan”. Bli Nyoman ngidih apang tiang dadi anak luh ané melihara bibit manik ragané di basang tiangé. Jani rumus kedokteranné suba sayan maju, siba nyidang merékayasa génetika di luar rahim, tur nyelapang di basang anak luh lénan sakadi apa ané adanangé bayi tabung. Tiang lakar beling, nanging maniké ento boya pianak tiangé, tuah pianak Bli Nyoman lan Luhné.

Kurenan Bli Nyomanné tusing nyidang beling, sangkaning rahimné tusing sida melihara manik. Suba ping telu pianakné kruron, ngaénang kurenané nyerah, pasrah. Dugas dokteré ané meriksa ngorahang sujatiné Bli Nyoman nyidang ngelah pianak nanging nganggo “perempuan penyedia rahim”, kurenanné setuju. Sawireh, ovum lan sperma ragané ajak dadua ané lakar anggoné rékayasa génetika luar rahim.

Kéto Bli Nyoman nuturang tekén tiang, muané ocem disubané suud nutur. Tiang nu makeneh-keneh. Rasayang tiang Bli Nyoman bes juari teka ngalih tiang tur ngidih ané tidong boya tekén tiang.

“Bli, dadiné bli teka mai tuwah ngidih nyilih basang tiangé?’’ Kéto tiang banggras, “Apa kadén Bli tiang, anak luh kén-kén mirib tiang?”

“Luh, tulung bli. Né penting apang I Luh nawang. Kurenan bliné ba dasdas buduh sangkaning tusing ngelah pianak. Makejang nyamané misuh-misuh bli, orahangé bli nak muani bekung. Bli tusing bekung Luh, dokteré suba muktiang ento. Sangkaning kurenan bliné dogén tusing sèhat. Yan bli bekung, tusing ja kalar kruron maniké ané suba ada.”

Tiang bengong, apa dayan tiangé jani. Kopiné ané maseduh di arepan tiangé suba dingin, rasa nék ulun hatiné dugasé nginem kopiné.

***

“Yan tiang prasida nyerahang basang tiangé tekén Bli, ada pangidih tiangé abedik,” kéto tiang ngraos tekén Bli Nyoman dugasé ragané teka buin ka pondok tiangé. Langité suba peteng dugasé ento, tiang nepukin bintangé makenyit liu pesan.

“Apa to Luh, sambatang! Tusing abesik, liunan tekén ento lakar isinin bli pangidih I Luhé,” Bli Nyoman nelebin paningalan tiangé sekadi pidan, tiang tusing prasida ngengkebang.

“Maniké ento boya gelah Bli lan kurenan bliné. Nanging mula saja pagelahan Bli lan tiang. Boya pakanténan cawan pétri, nanging pakanténan Bli lan tiang.”

Wanén! Wanén pesan tiang ngidih buka kéto tekén Bli Nyoman. Ragané makenyem, laut maanggutan. Mirib ané ada di kenehné mula patuh cara ané ada di keneh tiangé Sangkaning tresna.

***

Kija Bli makelo ninggal tiang? Sakadi kedis, Bli suba joh makeber, nambung. Suba makelo, makelo pesan tiang padidi. Tiang makelo kilangan Bli, tusing buin nyidayang cara pidan, ngelut bangkiang Bliné tekek yan tiang sedih, ngembel liman Bliné yan tiang takut. Sabilang peteng, sabilang tiang inget setata tiang ngastiti ring Hyang Widhi, Bli seger selamet panjang yusa.

Dugasé ento…. Makelo tiang tusing nyidang masaré. Dapetang tiang Bli sirep leplep di samping tiangé. Angkihanné gagéson sakadi malaibang peteng. Makelo tiang makeneh, sira Bli sira tiang, dija Bli dija tiang, dija ragané ajak dadua? Sira ngardiang buka kéné? Di petengé dugasé ento, baniang tiang ragan tiangé ngelut Bli cara pidan, kanti ka tangkah, kanti ka keneh Bliné, kanti neleb ka déwék Bliné…

Tiang tusing nyak nawang, kénkén Bli Nyoman nyatuang unduké ené tekén kurenanné di Surabaya. Miribang tiang ragané nguluk-nguluk nyatua, mirib ragané ngorahang suba man anak luh ané lakar dadi “ibu pengandung”. Mirib ragané nguluk-nguluk, anaké luh ento ngidih apang delokin sabilang minggu, nyagerang dewék tiangé seger. Miribang tiang ragané masé nguluk-nguluk, ngorahang tiang sing nyak katemu ajak kurenan Bli Nyomanné, takut yén marasa maniké tusing gelah ragané. Uli dugasé ento tiang sah dadi kurenan Bli Nyomanné, yadiastun ané nomor dua, nanging pianaké ané jani kadut tiang setata dadi nomor siki. Wanén! Saja wanén tiang.


saking: www.balipost.com