Inget

Tumbén tiang marasa kabangunang kapin mémén tiangé ané newata.

“Gég, bangun…, bangun…, bangun,” kénten rasayang tiang mungin i mémé mangunin.

Maksa-maksang tiang bangun.

“Nak nguda ya, i mémé saet sajan mangunin uli kaladiatuanné, pasti ada ané penting sajan,” kéto keneh tiangé. Ané ngranyanang sahasa mukak matan tiangé.

Tolih tiang kema mai, sing ja ada apa. Kéwala munyin mémén tiangé enu macenging di kuping tiangé.

Dina ento kuping tiangé cara kabekin tekén mungin mémén tiangé ané nondén bangun.

“Gég bangun…bangun…bangun…,” kéto setata ané dingehang tiang.

Dinané ento tiang magarapan cara biasané. Apa ané rencayang tiang uli ibi puanné, jalanang tiang dinané ento. Saja tiang sing taén nyak mapuangkid. Apa ja ané nyidang jemak tiang galahé jani lakar jemat tiang prajani. Sing buin misi mani puanan.

“Yén nawang mani puan tiang sing nyidang nyemak gaéné ento. Urip baan nyilih, sing tawang bin pidan lakar tagiha,” kéto setata ané kenehang tiang, ané ngranayang tiang mautsaha mragatang gaé, apang tusing nungkak.

Tiang ingat di keneh tiangé ada majanji lakar ngemang keponakan tiangé baju. Jani keponakan tiangé ento suba nyak paek ajak tiang. Pepes ia nagih beliang kéné beliang kéto, ngidih kéné ngidih kéno. Tiang masih demen beliang lan ngemang ané nyidang isinin tiang. Yadiastun reramanné mémé lan bapanné tusing démen kapining tiang, setata nundung tiang, keponakan tiangé ento sing milu-milu. Ia biasa-biasa dogén.

I pidan ia saja ia cara mémé bapanné, milu nguber tur nagih nyagur tiang. Ngorahin tiang magedi uli jumah tiangé. Ngorahang tiang lakar ngrebut warisné. Kéwala jani, ia sing taén mamunyi kéto. To awinan tiang sayang ajak ia. Makita sajan ngemang ia apa ané gelahang tiang.

Suba uli makélo tiang ngelah keneh ngemang ia pipis, apanga ada bekel né mani puanan. Tiang suba nambun-nambunan pipis, lakar dépositoang tiang ia pipisé ento. Apang ia tengkejut, tiang ané lakar népositoang, lakar idih tiang foto copy KTP-né.

Uli semengan tiang suba kenyar-kenyir ngenehang demenné keponakan tiangé gaénang déposito. Suba uli puan tiang ngorang ngidih foto copy KTP-né. Ia masih suba majanji ngemang.

Jani tiang suba, sayaga lakar ka bank. Alihin tiang keponakan tiangé ento, tagihin tiang foto copy KTP-né cara janjiné puan.

Tiang sajan-sajan tengkejut nrima panampinné.

“Cang sing nyak berususan jak Ci, Ci sing dadi nangih warisan, Ci nak luh. Gediang iban Ci né uli dini. Umahné, umah cangé, lan mémé bapan cangé ané ngelahang,” lantang sajan munyin keponakan tiangé ento. Tiang sing nyidang buin ningehang lanturang munyinné krana tangkah tiangé malunan engsek. Yéh matan tiangé, malunan ngetel.

Becatang tiang malaib ka pangaén, buung tiang gaé déposito ka bank.

Inget tiang buin teken unduk ané pidan-pidan, dugas mémé bapan tiangé nu idup. Dugas, ento beli, ipah, lan keponakan-keponakan tiangé ngrebut tiang, nundung tiang apang magedi uli jumah, kéwala mémé bapan tiangé tusing ngemang.

“Gég, bangun…, bangun…, bangun…,” buin dingeh tiang munyin mémén tiangé ngebekin kuping. (Gék Yatri)


saking: www.balipost.com

Lumut-lumut Watulumbang (55)

Satua Nengetang Jlema


Ada anak ngorahang jlema koné cara keris. Tenggek jlema koné dadi patin keris, masoca mata dadua, misi ukir-ukiran cara kuping cara cunguh, mabungut magigi malayah bisa nyelép. Cutetné cara patin keris ané aéng. Awak jlema sa betén pala orahanga dadi saung keris. Kéto abet anaké punika maosang.

Enggang sampiné mabalih gong. Apa to?

Anaké ento nglanturang tuturné. Déwan keris sing lénan tekén Sanghyang Pasupati. Ida sané masupati sakancan keris. Awinan yén nuju Tumpek Landep sampunang keris besiné dogén tunasanga pamasupatian. Keris-awak puniki tunasang masih pamasupatian.

Anggut-anggut sampiné kiap. O, kéto!

Dueg sajan anaké ento nyambatang unduk buka kéto. Awinan sampiné percaya, jlema boya “buron” campah. Jlema ento buron tenget: ia ngaé keris, ia masupati keris, ia tengetan tekén keris.

Buin masih ia ngorahang jlema koné cara méru. Sambatanga di tengahan awak jlemané koné ada cakra. Tongos cakra ento matumpang-tumpang cara méru, uli cakra ané paling betén menék-menékang nganti cakra ané paling muncuk. Sabilang tumpang maka sthanan Ida Betara koné.

Buin sampiné enggang mabalih gong. Apa to? Anaké ento nglanturang tuturné. Ané ngaé méru di awaké majujuk orahanga tulang ané misi sumsum di tengahé. Di cakra ané paling betén koné ada cara lelipi saab (kobra) pules. Yén lelipi ento idup, apabuin majujuk ngliwatin cakra-cakra ané ada, ento koné ngranayang anaké siddhi.

Anggut-anggut sampiné pengeng. O, kéto! Ngancan nenget-nengetang jlemané yén saja keto. Liu sajan ada Betara di awaké. Uling jani sing dadi ngawag ngaba iba, ngejang iba, ngubuh iba. Koné yén ngawag-ngawag bisa énggal Betarané magingsir. Yén Betara magingsir, awaké patuh cara pura sing misi déwa. Tengetan tekén méru masih ada koné.

Apa to? Sampiné suba ngeh, tawanga ibané tunian mabalih gong. Jani sampiné ngembék-embék cucud ia matakon. Déwékné masekenan lakar ningehang dharmawacana.

Marérén Juru Angoné nepak gong. Cara anak sadu, makisi-kisi ia di kuping sampiné. Jlema ento koné patuh cara Ongkara. Tenggek ané bunter sing lénan tekén windu. Pala ané masambung lengen neked ka jrijin lima kiwa tengen ento arddhacandra. Awak sa betén pala ento aksara Ong. Bok duur tenggek dadi nadané. Ongkara madan kuta-mantra, mantra paling utama, sthanan Ida Betara ané paling tenget. Tengetan tekén ento sing koné buin ada.

Dong jlemané ané paling tenget? Mula paling tenget yén saja suba patuh. Dija ngalih jlema ané seken-seken patuh buka kéto di guminé. Jlema ané patuh buka kéto liunan orahanga ada di satuané. Tengeté masih matumpang-tumpang cara méru. Tumpang ané beténan pangenahne aéng. Tumpang ané duuran sujatiné suci. Yén nyidang suci buka kéto, mara madan patuh.

Iteh Juru Angoné ngamigmig pedidi cara anak kalangenan tekén karirihane. Sing tawanga sampiné léb kija kadén. IBM. Dharma Palguna


saking : www.balipost.com