Linggih Luih

Olih I Gst Bgs Weda Sanjaya



Linggih Ibu alinggih luih
Linggih luih angawerat gumi linggah
Linggah paumah makebyah benyah
Benyah jagat titiang amuk lancah…

Réh Ibu sampun luih irika malinggih
Kasengguh lungguh titiang malisah nyumbah
Yan tan nyumbah titiang kasengguh langgah
Langgah ring palungguh, cangkah cumangkah…
Ah,, titiang déréng purun benyah…

Titiang nyumbah,
Ibu mangda tan nyimbuh…
Titiang nyokor,
Mangda tan Ibu nyegor…
Titiang meneng,
Mangda Ibu tan nganeneng…


Titiang wantah panjak, ring élah Ibu ninjak.
Titiang wantah ring sor, nyantos paswécan Ibu ngecor.
Titiang wantah warih, kijap-kijap mabalih,
Ibu malinggih ring genah luih…


Risampun malinggih luih,
Mogi palungguh tan ngawi binyuh,
Umah titiang ring jagat linggah,
Tan lancah langgah mangawi benyah…
Pada layah….
Madé Suweta Aryawan



Kepung Lawat Bulan Kepangan


Rambut selem demdem
Maombak ngayunang manah liang
Ditu tongos ngengkebang sedih
Misadia ngejot liang
Engsap tekén angin suung
Makebir ngaba rasa
Tusing galang


Ada kebitan keneh
Luas ngalih telaga lega
Paak tingalin nanging ejoh dirasa
Wireh sing tepuk rurung luung
Bengong tiang ngantiang
Tusing ada ngungkab lawang
Alas tusing madurgama
Nanging madinding manah sungsang
Liu ada muncuk nguda
Makelap nunden ngepik ngejuk
Masrana tresna rena


Tiang inguh lacur duur batur
Sing sida matindak
Ngejuk rurung liang
Enyén ajak
Enyén tundén
tiang sing nawang lawang
ngatogor tiang
rebut bingung uyeng uyang
budir tiang matindak
batis kejok keneh liwat
keneh makalangan
kepung lawat bulan
padidi bingung
ngempug puyung


saking: BaliPost.co.id

Puyung

olih : Ida Madé Giur Dipta

Puyungé waluya malalung,

Puyung, makada buwung,

Puyung, mapuara suung

Puyung, mangawe bingung.



Payuk puyung mamunyi mrungpung,

Padi puyung, sunggar sumbung,

Di manyine kajekjek linglung,

Payu limpung katulung-tulung.



Uduh cening

Da baanga awaké puyung mamung,

Isinin puyungé aji kaweruh luwung,

Apang dadi adi luhung,

Tusing bingung.





Pandé Kurniawan

Nyeritayang Ujan



wénten gesit, sané mamargi

ri tatkala masan ujan kémanten

wénten malih crita, sané prasida katuturan

yéning nemonin sasih sampun ngelingsiran



mangkin, wantah pangaptian

sané kaartiang yéning crita

nénten ngrasayang gesit

lan ujan wusan ring pananggal

sané janten sampun

ngerépatin manah mangdané ngutsahayang

nyeritayang gesit punika









Negesin Ujan



negesin kukuh nyané suaran ujan

wantah prasida kadabdabin

olih kembang nyané sekar kemoning

sané ngrentebin alus desir angin panyemengan

salanturné

ulung, lan masanding malih sekadi pituduhné

sané engsek, ngresepin akah sekar kemoning

lan ngrepatin samar-samar pejalan matanai







Karmaning Ujan



ujan encah apetengan

tanahé kembang licitan

makasami senawané malih milpilan padéwékan

ngutsahayang ngembangan pusuhné jepun cenana

ngutsahayang ngelanduhan pucilné semaga bona

rumasa punika

karma karmaning utama.





Pangastungkara



yén sagét

sledét adi bibih bli

sané ngulangunin bulan purnama

indayang

sliahin ajebos, apange tusing tungkakan bli

purwaniné

lan ngidang ngemang kenyem

malarapan pangastungkara

pinaka panyumun tanggalé punika

Paksi Lara

olih: I Komang Gedé Héndra Arismawan

Paksi Lara

Tan kaarepang pacang maurip Durung embas mautsaha katundung Kadi swecaning Widhi Tan sida ngulah I Paksi Manadi I Paksi Lara ngurip ring sekala Pramangké kasayangan Pangacepé riwekas gumanti maguna Tutur kadarman genah matinggah Sakancan widia pinaka ambara Doh saking paumahan Sang Lara ngeberang raga Malajahang angga nyagjag genah mapaguru Ngimbang katempuh Sanghyang Bayu Disubané misi Pacang mawali sada nguci Nguci indiké né sujati olih: Ketut Sariani Lingsir Bayuné ngancan maendukan Makipekan tuara nyadia Madelokan menek sayan ulap Mangicir paningalanné maliat tuun Runuh bayune mapapasan ring anaké busung uyung puruhé bakat kelidin nyelémpoh sakadi danyuhé ulung ramé mabriuk anaké tuah nolih bangun mabekel rapuh nyadia padidi kéwala bakat némpél témbok magaang bisa sambilang manyilapin sisan-sisan sarin tanah ngisinin sisan idupé mangenepin tuuh bajang nyanggra lingsir matekep paliaté lamur lelor majukut sambel sera gadang-gadang sampun ngliwat mangkin tuah nyelémpoh laut matédoh ngantosang uripé lamur ngancan tusing maumur Rindu ring Ibu Selid sanja kumpulan raos bakat ingetang Samian maguna lan samian patut laksanayang Pitutur anak tua Pitutur sané mautama Sami mekelin anak alit sané maguna Surat-surat sané mautama lautan simpen Tindakan lantang Madaging aketan-aketan cita Bungan rasa makembang makendelin raga Ngiring ibu... Sarengin titiang okan ibu Putrin ibu mangkin sampun bajang Sampun wénten tresnan lantang Ngantungan urip Mawali ibu ring ragan titiang Rindu atin putrin ibu Maguyang manah laut makeber ngindang Ical malih rasa rindu kauyak gulem Sedih kasih-asih Matimpalan ujan sabeh maliah toya puek Ibu tiang sebet kaiket tali seket Mriki ibu sarengin Bingung titiang matindakan ten wénten ibu ngraosin

saking: http://www.balipost.com/mediadetail.php?module=detailberitaminggu&kid=19&id=29636

Peteng

Dayu Himas

Jaga surut sunar ai,
makaon nilarin gumi,
nuju sunare lampus,
i kembang bintang matembang,
semarandana angucap,
nyulempoh ipun,
nyantos toyan segarané,
rauh ka pasisi,
nanging toyané nyansan surut,
surut nguber matanai,
i matanai kantun mamengkung,
bengkung,
lascarya ipun,
ninggal i kembang bintang.



Dayu Himas

Urip


Remrem guminé
nyaputin langité galang kangin
suung, kayunné matedung sepi
miribang suryané sampun uning

kenyungé i rika
macampuh lara
nylémpoh maselselan

inget tekén unduké i pidan
ngetékin sakancan manis idupé
né jani sayongé nglikub ngebekin tangkah

sesek

engsek

sing nyidang ngelidin
jani suba galah nyujuh suarga loka,
miribang suba pajalan idupé
idup matine tusing dadi tawah
tuah amonto tuwuh uripé
manumadi nyalanin sakancan lara,
nyalanin sakancan manis idupé,

pangucapé si duri,
dumogi atmané amor ring acintya



I Wayan Buda Yasa

Peteng


Guminé peteng dedèt,
Kelambu wenginé selem tanpa bintang
Tan wénten sunar galang
Makejang pati kaplug
Pati grepé ngalih tongos
Tongos tis negakang jit

Di baduur tegeh negak
Aluh masesambat
Dengkak-dengkik
Tuding tujuh mapi ririh

Ah... jeg ngelahin
Amah-amahan motah sabilang wai

Nanging
I dadong rerod tunggang-tungging di paon
Peluh nyrékcék
Apang sida makudus bungut paoné
Sabilang wai tuah makeneh
Makeneh ngalih abulih baas jakan

Gumi kenyat,
Keneh jengat,
Uat pegat.


saking: www.balipost.com

Kali Sengsara

Acharya Wasudeva


Guminé sumingkin keped
Momoné makada rered
Jatmané ngaku-ngaku duég
Oh... Hyang Widhi titiang nunas mapinaweg

Duké ilu
I rika ring wangsa Yadhu
Sang Sambha ngaku digjaya
Nyentokin Sang Sadhu Acharya
Ngwehang daya upaya
Mapan marasa okan awatara

Dayané ketara
Guminé ngemasang kali sengara
Manusa lara
Apan dot ngliwatin betara?



Pandé Kurniawan



paripurna


(i) sabayantaka

nyalanang sané prasida mabuat
disubané kabaktayang
olih gelis rahinané, ngulengan apanga
prasida kamanahin, diastun cutet
wénten parilaksanané sané kasumbungan
pradé galahé nemonin kasujatianné



(ii) tusing ngidang ngelidin
ada galah né ajak majajal
makerahin encén sané patut utamayang

laut, samian layuné kembang
kambang tusing bani ngimbang
krana seselé sakadi
gula pait, ngéncolang ngecapang pajalané

égar, disubané konyangan
encah sambrag, pangawak ala ayuning rahinané

né patut lakar tohin
wantah pangantosan pepet pahing rahina anggarkasihé



(iii) nénten wénten
sané pacang mangetélan yéh panyingakan
sawiréh wénten papatutan
silih sinunggil
antuk karma,
karmayoganing manusa



semeng


nenten sangkaning jejeh
ngetohin sepiné pacang nulakan semengé
sané mapanganggé remrem
boya je gading manis sakadi
réncang dingin ngremengé makliab
nyalang.



Dayu Himas

Urip


Remrem guminé
nyaputin langité galang kangin
suung, kayunné matedung sepi
miribang suryané sampun uning

kenyungé i rika
macampuh lara
nylémpoh maselselan

inget tekén unduké i pidan
ngetekin sakancan manis idupé
né jani sayongé nglikub ngebekin tangkah

sesek
engsek

sing nyidang ngelidin
jani suba galah nyujuh suarga loka,
miribang suba pajalan idupé
idup matine tusing dadi tawah
tuah amonto tuwuh uripé
manumadi nyalanin sakancan lara,
nyalanin sakancan manis idupé,

pangucapé si duri,
dumogi atmané amor ring acintya


saking: www.balipost.com

Puisi Olih Sang Madé Tresna Wicaksana

I Tukang Pacul



Jegjeg tangkah lan tekek limane ngisi pacul,

satmaka prawira ngagem gada

I rika ring rananggana pangupa jiwa,

maperang ngadepin baret angin kahuripanné

tameng kesiran anginé sampun lebur,

kagebug kebyakan panas surya sané nyentar

kadi ayuta panah sané durus nancepin carma,



Wéntenkéh sané rungu?

Kala ipun magutit ring carik

Duk sanga yuta wadua peluh medal ninggalin sang carma

Pakeh peluhnyané nyihnayang pakeh urip sané kamargiang

punika pinaka bulih-bulih sané benjangan pacang medal saking pertiwi

pinaka amerta anggén nglanturang urip i raga sareng sami



Durus aksi!

i tukang pacul kapecik, kacekik olih ajin rabuk

Tanah lan toyane milu mucingin,

i walang sangit lan i bikul milu ngrusuhin,

Bénjang pungkuran yén i tukang pacul ngunggahanng kober petak,

Sira sané pacang makenta?





Indria ring Kali Yuga



Bibihé mangkin sampun caket ngraosang dharma

Kupingé mangkin sampun bongol miarsayang krimik manah

Kalih tanganné sampun tan sida makarya melah

Idepe sampun tan mresidayang mepineh rahayu

Ring i riki

Genah sarwa bibih sané makenyem bogbog

Genah sané wantah ngajiang raga

Genah sané ngwaregin basang pedidi

Genah sané nyungsung momo angkara

Genah sarwa Penyingakan sane tan suka ngaksi anak bagia

Dija ilang genahé dumun?

Genah silih asih…

Genah saling pakenyung…

Genah masawitra…

Genah manyama braya…

Genah sane santi lan jagadhita…

Ratu Betara, Makakalih Batis puniki tan mresidayang ngatehang pesu saking genah driki, durusang, ancit tiang saking driki…..





Dayu Himas


Jaga surut sunar ai,
makaon nilarin gumi,
nuju sunaré lampus,
i kembang bintang matembang,
semarandana angucap,
nyulempoh ipun,
nyantos toyan segarané,
rauh ka pasisi,
nanging toyané nyansan surut,
surut nguber matanai,
i matan ai kantun mamengkung,
bengkung,
lascarya ipun,
ninggal i kembang bintang.

saking: www.balipost.com

Pupulan Puisi Basa Bali

Ida Puspita
Ombak



Suara ombak magulung madingehan

Singgah di pasisi

Tusing ja emed

Tuah akejep

Mawali akijapan mata

Ka tengah nyujuh segara

Maganti timpal ane lenan

Yaning ada sisa dosa

Ombak lakar mawali

Buin neked pasisi





Meled



Meled titiang mulih

Emed suba titiang ngumbara dini

Petengé karasayang

Titiang suba tan pabayu

Makejang laksana enu kaingetang

Rasa sakit pinaka jalan

Tur buta ené pinaka guru

Ngajahin nolih sané pastika

Titiang iwasin Ida

Titiang suba ejoh

Titiang meled mulih









Kadék Purnami

I Luh Jepun

Titiang panyeroan i ratu,
Nénten tatas indik matur

Geginan tiang wantah ngalap sekar,

katur ring i ratu,

angge ngias prabu i ratu sané megelung emas.

Luh Jepun wastan tiang.
Tiang boya ya i bungan sandat sané miik ngalub.
Nanging i ratu mapaica genah sakadi tiang i sekar sandat.

Ring merajan i ratu titiang mangayah,

makamen putih masenteng kuning.

Ngukup toya miik ngalub;

agni ngeseng i kayu cendana,

jebug arum, pandan arum, lan gendis.

Andus nusdus,

maukup ukup toya kumkuman

anggé i ratu manyirat prabu magelung emas.

Rerantas, wajra , ketu sampun sayaga
Ngiring i ratu munggah
Titiang ngiring i ratu nyurya suwana.

I cempaka mebunga ngarémpyok,

mareruntuhan ring natar merajan.

I riki tiang mangayahin i ratu,

makidung warga sari, tedun tirta.

Anggob manah titiang,
I ratu mapaica genah ring merajan sané kasuciang.

Tiang luh jepun,
leteh antuk dosa.
Nyalanang idup ring marginé kiwa.

Las i ratu nuntunin tiang pamargi,
I riki titiang mangayahin sisan tuwuh sané kapaica,
ngiring i ratu,
ngiring pamargi sané kaloktah.

Tiang luh jepun ten tatas antuk matur.
I riki mangayahin i ratu.


saking: www.balipost.com

Togog Bias

Olih I Madé Molog


Gaénang uli bungkulan bias ané belus
baan peluh+angkihan bendéga
Jukung ané ngancab di tutuk lancuté
Mabidak tapakdara ngelebutang matanangin uli pancer+Kantih:
''Ené togog bias ané ngememan panes matanai
Ombak ané engag di gemelan
tusing nyidang nganyudang
kenehé inguh
Miik pudak+ngas bulung+pakeh uyah
dadi saka kubuné
Ané buin akatih: awak ané rumpuh!''


Di pasisi: Bulan kapangan
Kedisé maceliek saka ukud. Anginé dadi
Ombak nyeled di tutuk palesé
Di langité: lelawah nyelebongkot di uluan buahé
Dija jani mamondok:
Rerangon reod. Dadi menéga dini
''Apa ané nyangkét di tokalé:
Santana+kawitan+ lutung
ngandang di beseg yéh mata
ané makateltel!''


Togog bias mawarna gedubang
tan pakletugang angkihan
Kupukupu matinggah ditu: Ngaé bunga
Panak naywan lekad ditu: Ngrembesin madu
Bulung masih mentik ditu


Togog bias majujuk nganti enyag
ngelemang bianglalatu
katengahing warna paling selem!


Nyén ané sebet gati ditu
nyebatang makadua limané...

sumber: www.balipost.co.id

Jukung Kloping

olih I Madé Molog


''Melayar jukung kloping ngliwatin hidup
tiangé. Ngliwatin linggah telapak
tangan jroné, nganti neked tembok
pelabuhan+loloan+kubu ané melah!''


Tiang galma tani: nanem panes matanai
dingin sayong+bunga-bunga madu+
bulung+bungkalan kaang.
Nyén ngadén: dalem gemelan+dalem keneh
panes matanai+panes bintang
tegeh pakeberan+pelung warnan langité


Kaliwatin jukung kloping rembesan yéhé ento
Singid jalan katuju
Kalapu-lapu di ulunatiné


Kedis+kupukupu saka ukud lekad
uli panes gemelan, maceliek
lantas ngenah di bongkol lawaté
dija matinggah krana donné tan pacarang,
bungané tan pawarna+madu!


Katulis dini jukung kloping
ngambarang segara
baan warna anacaraka
alinggah patindakan
nempuh suwung
pajalane singid
''atehang tiang ngliwatin
bimasakti ané kambang di manis madu!''

sumber: www.balipost.co.id

Paid Tiang (I Wayan Paing)

Paid tiang tindakan batisé

Ngalahin ukudan sasihé

Ngipekin kalah

Sisan-sisan kenehé suba kacamputang

Pakpak katelahang

Apanga tusing taén buin

Ngurimik ipit ngumbar kita

Paid tiang makejang

Ngejohin sasih

Ané tusing taén bakatang

Paid tiang makejang

Nguberin sasih

Ané tusing taén gelahang

Camput mapaid

Telah-telahang kauluh.

sumber: http://imadesudiana.wordpress.com/category/puisi-bali/

Ngantosang (I Wayan Paing)

Di betén muncuk lalangé lanying

Nyungéngét ngantosang ulungan ia i capung

Ané paling tusing nepukin sunutan mulih

Kletik-kletik suaran detik

Pamargin Ida Betara Kala tatar alon

Nyaksiang patongosan tiangé dini

Bengong mapaliat samah

Pakukékkak kéék-kéék

Munyiné i katak mapag sasih

Buin nepukin tiang dini

Yapin atiban suba liwat patemoné malu

Dini, padidi

Tiang ngantosang

Layuné ya i lalang

Ngulungang kulesan capungé né aptiang

sumber: http://imadesudiana.wordpress.com/category/puisi-bali/

Lalang (Pandé Kurniawan)

gerimis sané ulung ngapuan

inggih punika kruna

sané ngamedalang girang

sané ngicénin liang

sané nungkulang galang

sané nyayangang lalang

nulekep ring sidakepan pertiwi

nguntulang raga

pinaka saksi sasih makiré kalima

pinaka saksi bunga sampun kembang

pinaka saksi semeng janten nyemengan

lan, lalang nyarengin

tan paucap apisanan

sumber: http://imadesudiana.wordpress.com/category/puisi-bali/

Indik Galah (Pandé Kurniawan)

Dijaké galah sané setata belus

olih yéh panyingakan adiné

lakar ingetang titiang

lakar kenehang titiang

i riki ring salantang sasih

sané durung kapegatang

tan pajiwa

lan nénten malih polih matakén

indik galah sané lianan

sumber: http://imadesudiana.wordpress.com/category/puisi-bali/

Selat-Kerambitan (Pandé Kurniawan)

padi nguntul nyujuh muncuk cemara

pusuhné bengul nguningang angin sanja

nuturang

indik bungan padang sané lakar kembang

barak nguda gumanti sayang

nanging cemara kari ngatiwawalan

seenanné durung gadang

doné tan mrasidayang kambang

payu segul

ngetélang kenehé i riki ring selat-kerambitan

sumber: http://imadesudiana.wordpress.com/category/puisi-bali/

Pawayangan (IDG Palguna)

Ring kletakan suaran cempala

Sané kakilit bebatélan gendér

Kayonané mapolah

Sakadi gunungé rubuh

Sakadi suryané anincap gunung

Sakadi paksiné anglayang

Sakadi tukéné anyud

Ri tatkala sanghyang ringgit

Tedun ring sajeroning pawayangan

Sangkaning pangastitin ki dalang

Rumasa titiang ring padéwékan

Tan bina sakadi wayang

Semeng sanja lemah peteng

Buduh paling ngulurin kalanguan

Lipia ring uripé cendek

Kayonané gelisan matanceb

Kasineb antuk geguneman

Kija mangkin pacang ruruh ki dalang

Damar bléncongé sampun padem

Jakarta, Agustus 2007

sumber: http://imadesudiana.wordpress.com/category/puisi-bali/

Siwa Ratri; Tapa; Yoga; Samadhi (Djelantik Santha)

1. Siwa Ratri

Prawanining tilem kapitu

peteng sipeng kadi bulun petu

I Lubdaka ngepil jerih mati kutu

mamona ngepik-ngepik daun taru

nyiksik bulu tan lali madéwa ratu

éling dosa tan naen ngaturang caru

uleng maburu ngulurin sadripu

déning swadharmané mula iku

Hyang Siwa ngicén swarga maha ketu

sakatiling ambek sané patut tiru

anggén suluh naptap peteng pitu.

2. Tapa

Sang Sadu ipit tengah alas ramé

sipeng sepi tengah pasar ngipi

puser gumi jangih tengahing kidung

lampah laku sidi wakya sandi pari suda

yan durbudi dija-dija ngawé wéci

tapané tepu ogah ripu.

3. Yoga

Tungtung yasa guruning yoga

tungtung bhakti dasaring yoga

tungtung laksana karmaning yoga

yogia nututin kandaning yoga.

4. Samadhi

Bingung ngruruh puyung

gelar gelur tan pasaur

matajuh matimpuh tan kapangguh

makenta mamona taler sunia

kaja kelod kangin kauh tan patanggu

peteng lemah ngasah asih asuh

ring unteng Samadhi wénten Widi.

Dénpasar, Galungan, 23 Januari 2008

sumber: http://imadesudiana.wordpress.com/category/puisi-bali/

Sinom-sinoman Wreda (IDG Palguna)

Puniki carita kalintang nista

indik wang lingsir

sinoman wreda dané kasengguh

apan nguni kocap kasudi

pinaka tameng papacek gumi

Mangkin

ipun i sinoman wreda

nandang idup kalara-lara

tan pasanak braya

nyabran rahina nyliksik bulu

saha ngapé-apé jagaté wayah

majalaran tembang mawarni pinunas:

déwa ratu sang hyang embang

kedeh titiang mangastiti

i ratu sang ngawiwenang

uripé sané asiki

mangkin meled titiang ngapti

mangda i ratu mapuwus

ledang bancut urip titiang

apan tan malih kasidi

mangda puput

utang titiang dadi jatma

Cendek tembang dané

I sinoman wreda

Nanging teges pinunas ipun

Jakti singsal minab pupuhé

Sangkaning tuwuhé nampekin sanja

Nanging sira ugi jagi urati

Mapidabdab indik tembang

Ring ulu atiné

Sané kalintang sungkawa

(Beh, i guwak pasliwer gaok-gaok

Mapi-mapi duta hyang yamadipati

mapengarah ring jagat sadaya

wénten manusa mapag pralaya)

Jakarta, Maret 2008

sumber: http://imadesudiana.wordpress.com/category/puisi-bali/

Papupulan Mati (R.A. Dampaty Anja Anjani)

1. mati jalan mulih

urip rurung ka sétra

mati jalan mulih

: aksara umah ipian

awu tungtunging kuku

muncuk rambut bau-bau

: asep wangi taring lanying

di tanah batis maumah

umah getih betén kulit

: pikeneh di kadituan

2. mani puan

né suba liwat orahang ibi

tuara kagisi madan jani

sing tawang adanin mani

ilang buin teka nika puan

ibi jani kema mai mani puan

beneng rurung mamuter margi

murwa utawi mapradaksina

kala kali kalika kaluku

kaki nini kaka kula

3. sing neked

gelar gelur gelar tawur

ngidih api kunang-kunang

nunu awak di tegal anak

nambus ati lablab nyapnyap

endih kunang-kunang

kadi bulan ngawé galang

sing panes sing api

sing lebeng sing jati

kalangen sing neked

4. dini jani

sandhibhuta abian tuwuh

sandhikala tegulan angen

: bhuta némblés amah kala

ditu malu dini jani

pidan kapan mani puan

: angkihan angin angonan

bhuta lima kala ukud

mahakali mahabhuti mah-amah

: kula kedat tepuk peteng

5. pocol

tanah lemah sampun pejah

wai-apah tan paumah

api-ai megat lampah

wénten angkihan sisan angin

layangan i raré pegat tali

sawat di langit wates liat

sampun huwus gumi maputer

kija bulan ngaba peteng

pocol matan ai nyantosang

6. balik

ya buta sing mabapa

sing mamémé ya kala

mula né buta ngalih bapa

kala ngamuk nagih mémé

balikang satuané jani

pajalan i buta i kala

ngliwatin umah bapa mémé

tan pabapa ibu shiwa kojar

sing embas tan lebar

7. api

api sing taén mati

ada utawi sing ada

andus miwah kebus

alit-alité mancing api

nganggon api

lingsir-lingsiré ngidih api

mabekel lakar api

nyén nguntul munuh bulih api

betén ombak pasih kelod?

8. aget lacur

aget ulung neked di tanah

réh ditu tongosé majujuk

maenjekan utawi negak

aget ulung ngengsut di carang

réh ditu tongosé matinggah

nyiksik bulu meték abu

mula aget nepukin aget

réh ditu lakar nepukin lacur

makrana ada aget

9. mati

kupu-kupu

peteng-peteng

di pasirepan

di ipian ada tamiu

kisi-kisi manuturang

buin mani mati

semeng-semeng

ada kepompong

di pawaregan

10. puput

gunung betén pasih

api betén gunung

asep sungsang

pusering uteng

langité puun

pura kageseng

abu ampehang angin

song tulang kunda

yadnya puput

11. buta sami-sami

kija matan ai sing ngenah

dasa tiban surya séwana?

ia jani suba joh réh

puteran gumi mabading

malalinin galang linggah

ngutang pikolih makarma

koné ditu ada ayuta matan ai

lemah galang sing ada peteng

satuan anak buta sami-sami

sumber: http://imadesudiana.wordpress.com/category/puisi-bali/