I Baluan (1)

Olih W. Suardiana


Kacrita ada buron madan I Baluan turmaning ia makeneh lakar nangkilin Ida Sang Prabu Singa, ratun buroné makejang ané ada di alasé. Mara I Baluan teka napak di ajeng Ida Sang Prabu Singa, dadi tangeh koné Ida saha pangandika, “Ih, cai Baluan, dadi ngapang-apang tekan cainé tangkil mirib ada sarat apa lakar takonang cai tekéning Déwéké? Nah, tegarang sambatang!” Mara kéto pangandikan Ida Sang Prabu Singa, ditu lantas I Baluan matur sada dabdab.

“Inggih Ratu Sang Prabu sasuhunan titiang palungguh Cokor I Déwa, mungguing rauh titiangé napak ring panangkilan sakadi mangkin, wénten sarat pacang tunasang titiang ring palungguh I Ratu.”

“Unduk apa totonan,” kéto Prabu Singa natasang tekén I Baluan.

“Sané banget tunasang titiang parindikan ipun I Blatuk. Punapi awinan ipun dados ngrahina ngebug kulkul, mawinan ribut kaulan Palungguh Cokor I Déwa, yadiastun nénten wénten wicara punapa punapi, nget nyabran rahina ipun ngulkul bulus. Punika sané banget tunasang titiang, sapunapi sapatutnyané I Blatuk Ratu mangda sutrepti jagaté? Inggih titiang nunas kalédangan pakayunan I Ratu nepasin parindikané sakadi punika.”

Mara kéto aturné I Baluan, ngandika Ida Sang Prabu, “Nah, kéné-kéné cai Baluan, yan saja kéto tingkah I Blatuké, kema suba cai mulih, nanging orahin I Blatuk apanga buin mani semengan ia tangkil ka purian!” Maan pangandika buka kakéto galang koné paidepanné I Baluan tur énggal-énggal matur.

“Inggih Ratu, titiang pacang mapamit mangkin.”

Kacrita di jalan-jalan I Baluan kacunduk ajaka I Blatuk, “Nah, né apa I Blatuk sedeng melaha tepuk icang cai dini.”

Masaut I Blatuk sada ngreceb raosné, “Ma...an, ngu....da Baluan?”

Kasautin baan I Baluan, “Buin mani semengan cai saratanga olih Ida Sang Prabu apanga tangkil ja ka purian, da san lényok!”

“Kénkén mawinan tumbén Ida Sang Prabu madedauhan tekéning icang,” kéto patakoné I Blatuk tekén I Baluan.

“Ah, buat ento icang tusing nawang, mani ditu tunasang tekén Ida Sang Prabu di purian!”

“Nah, yan kéto, icang ngiring sakadi pangandikan Sang Prabu.” Suud ngraos kéto, I Baluan ajaka I Blatuk lantas belas pajalanné pada pada ngungsi ngamulihang. Sasubanné I Blatuk teked jumahné, engsek pesan koné kenehné ngenehang paundukanné buin mani semengan lakar tangkil ka puri kanti tuara nyidaang pules.

“Méméh Déwa Ratu, lakar kudianga ja i déwék buin mani semengan,” kéto I Blatuk makeneh padidi di pedeman sambilanga ilih-ilih sawiréh patambuas peluhné pesu naanang takut.

Gelising satua énggal, kacrita suba lemah, lantas I Blatuk ngiréang lakar tangkil ka purian. sasubanné pada genep bebekelanné, laut ia majalan. Tan kacrita di jalan-jalan, jani suba ia neked di purian, katuju Ida Sang Prabu Singa sedek malinggih di balé panangkilan, katangkilin olih para tanda mantriné makejang. I Blatuk lantas matur saha sembah.

“Inggih Ratu Sang Prabu, titiang naweg matur mamitang lugra.”

Raris ngandika Ida Sang Prabu, “Ih, nyén ja cai ento? I Blatuk aa?”

“Inggih, titiang I Blatuk kaulan Palungguh Cokor I Déwa. Awinan Palungguh Cokor I Déwa nauhin titiang, napi sané wénten wacanaang ring titiang?”

Ngandika Ida Sang Prabu, “Ih, cai Blatuk, né ada nyaman cainé, ia I Baluan, nguningang tekéning I Déwék, saja cai salemah-lemah ngedig kulkul, buina tuara ada apan-apan? Yén saja buka kéto, wenang cai kadanda baan nyaman-nyaman cainé soroh buroné makejang.”

Matur I Blatuk sada alus, “Inggih Ratu Sang Prabu sasuhunan titiang I Ratu, wiakti sakadi pangandikan Palungguh I Ratu. Awinan titiang purun ngedig kulkul salemah-lemah, santukan I Temesi setata ipun ileh-ileh ngaba umah. Yéning sakadi punika paindikané, titiang nunasang ring I Ratu sapunapi patutnyané ipun I Temesi?” Kéto aturné I Blatuk tekén ratunné Sang Prabu Singa. Dadi meneng koné Ida Sang Prabu ajahan, tur ngandika.

“Nah, yan kéto ja undukné, beneh pajalan cainé buka kéto. Jani, dadi suba cai mulih énggal-énggal. Sakéwala, cai apanga ngalih I Temisi, tundén ia mani semengan mai ka purian, tusing dadi sangkéang sajawaning ia sakit!” Baan kendel kenehné tusing kadanda, I Blatuk laut mapamit ngénggalang.

Kacrita di jalan tepukina koné I Temisi sedek majalan ileh-ileh mondong umahné, lantas I Blatuk ngomong kéné, ”Aduh, né apa sedeng melaha cai Temisi tepukin icang cai dini.”

Masaut I Temisi, “Men nguda Blatuk?”

“Mani semengan sajawaning gelem, cai kapandikaang tangkil ka purian olih Ida Sang Prabu Singa, ingetang san tusing dadi sangkénang!” (Masambung)


sumber: www.balipost.co.id

Lumut-lumut Watulumbang (44) Metemu di Tanggun Idep

olih IBM. Dharma Palguna


Anak ané sedeng méditasi sing dadi takonin. Yén nganti ya masaut, pasti suba buung ia méditasi. Buung ia koné lakar nepukin “paragan betara” ulian ngidem. Buin ia nyumu negtegang bayu, ngeningan sabda, tur nunggalang idep. Yén buin ada nak nakonin, tur buin ia masaut, buin ia lakar nyumu. Méditasi ento koné jalan néwék, kaduluh aji keneh padidi, sing dadi ajak ngorta.

Patuh koné tusing dadi nakonin anak sedeng ngregep makamen duur entud di pempatan sétrané jam roras peteng nuju kajeng kliwon enyitan. Yén nganti ia masaut, sinah suba lakar buung ia nglekas dadi kéné dadi kéto. Ané buka kéto orangaha jalan nyilib, sing dadi ada anak ngetarang. Yén ketara, buung.

Kéto upaminé, ulian munyi pasaut akatih dadi buung maan panugran. Patuh cara satua kedis nambung ngaba kekua di bungutné. Wiréh gedeg basangé cacada tekén cicing, lantas ia masaut. Ulian masaut bungutné enggang, kekua ulung maglebug. Makejang dadi buung. Kéto koné pangregep méditasin I Kedis.

Tegesné, sing makejang patakon anaké perlu sautin. Mula ada patakon ané sing perlu dingehang, apabuin sautin. Wiréh liu koné soroh gegodané. Ada gégodan alus, saru, samar, marupa patakon melah-melah. Yén suba tawang ento gegodan, sing perlu sautin, jeg gelengang majalan, sing perlu nolih kema-mai. Saka tilingan ing ambek, kéto baosanga tekén para wikané. Yén suba teleb, pageh, satya, nguda sing bakat.

Patuh cara pajalan bebotoh luas matajén, pada-pada sing dadi takonin. Yén nganti ia masaut, apabuin ngorta ajak né nakonin, ento koné ceciren lakar kalah. Nguda kéto?

Ada nak ngorahang suksman triguna tattwa patuh cara bebotoh luas matajen. Sai-sai ngadu ayam rajas ané galak mataji, apang kalah ayam tamas, tur menang mulih ngaba gapgapan ayam satwam. Yén ada bebotoh ngelah ayam satwam sinah koné lakar rahayu idupné sakulawarga. Upaminé satua Bagus Diarsa. Bebotoh kelas berat puniki matemu sareng Betara Siwa ulian teleb, pageh, satya ngadu ayam triguna-tattwa ring kalangan. Awak ipuné dados kalangan tajén.

Kéto katuturan satuané. Bagus Diarsa sing dadi takonin ri kala ida nguleng genah Betara Siwa masadana panah satwam, mabusur rajas. Yén Bagus Diarsa ngrunguang data-data, nyautin patakon kéné-kéto, mirib maimpas panah idané saking uleng-ulengané.

Liu bebotoh sing maguru tekén Bagus Diarsa. Kéwala yén luas matajén milu-milu cara Bagus Diarsa, sing dadi takonin. Pajalané nyerengseng, liatné beneng cara nak ngregep. Sambilanga majalan bibihné kemik-kemik buka nak nguncarang japa-mantra rahasia. di kalangané iteh ia matoh.

Bebotoh ané buka kéto koné madan bebotoh kalah. Yadiastun ia menang matoh, nu ia madan kalah. Ia kalah sing ulian siapné mati, nanging ulian kelangen. Bagus Diarsa inan bebotoh kéwala ida sing kelangen. Ida ané pantes mapeséngan bebotoh menang. Ida menang ring kalangan, taler ida menang ring triguna-tattwa. Ida silih sinunggil bebotoh sané matemu sareng Betara Siwa.

Anak méditasi, anak ngregep, anak matajén, sujatiné patuh. Maka telu bisa matemu, yén suba saja neked di tanggun idep. Dija tongos tanggun idepé? Yén idepé dalem, tangguné di dasar. Yén idepe luhur, tongosné di muncuk. Yén idepé ten kaidep, dija tangguné?

sumber: www.balipost.co.id